INI BUKU PUNYA ASAL.
Dalam tahun 1628, John Bunyan sudah jadi di negri England. Dia punya mak-bapa orang miskin skali, ttapi dia-orang kasi dia masok skola, spaya dia boleh blajar bacha dan tulis. Bila dia sudah bsar, John Bunyan jadi tukang tin dan dia jalan mana-mana kliling dia punya kampong dan buat itu macham kerja. Bila dia lagi muda dia suka champur dalam smoa permainan yang jahat, dan dia mncharut banyak skali, sampai satu prempuan jahat tngking sama-dia sbab dia mncharut itu macham; sbab itu dia rasa malu, dan dia choba buangkan itu adat yang jahat, dan dia mulai bacha Kitab Allah. Ada satu hari John Bunyan jalan-jalan buat kerja tukang tin, dan dia sampai di negri Bedford; sana dia dngar tiga ampat prempuan miskin yang chakap-chakap di tpi jalan deri-hal Tuhan Allah dan deri-hal jalan slamat, dan dia banyak hairan sbab itu prempuan sudah tahu banyak perkara fasal agama dan fasal Kitab Allah yang dia skali-kali ta'boleh mngerti. Kmdian John Bunyan sudah chari itu tuan yang jadi guru injil dalam greja di negri Bedford, dan bila dia sudah blajar sama itu guru lamalama, blakang dia jadi orang Kristian yang btul, dan dia trima baptis. Itu waktu dia punya umor dua-puloh lima tahun. Dua tahun kmdian, John Bunyan sndiri jadi guru injil, dan mula'i ajar orang dalam greja deri-hal jalan slamat. Dalam tahun l660 bila Charles II naik raja, itu raja kluarkan satu hukum yang smoa orang Kristian msti smbahyang btul sperti aturan smbahyang yang dalam Kompani punya greja (ông ke kaù). Ttapi John Bunyan ta'mau ikut itu ông ke kaù punya smbahyang, dan sbab itu bila dia ajar dalam dia punya greja dia kna tangkap, dan dia kna tutop dalam jel di negri Bedford dua-blas tahun lama-nya, sbab dia ta'mau masok ông-ke-kaù. Tempo dia ada dalam jel John Bunyan karang ini "Chrita orang yang chari slamat," Kmdian deri-
